मुंबई महापालिकेच्या पार्श्वभूमीवर शिवसेना ठाकरे गट आणि मनसे यांची युती ही मराठी मतदारांसाठी एक भावनिक आणि राजकीय संदेश देणारी ठरली असली, तरी या युतीच्या घोषणेनंतर लगेचच घडलेल्या घटनेनं राजकीय गणितं अधिक गुंतागुंतीची केली आहेत.
राज ठाकरे आणि उद्धव ठाकरे यांनी एकत्र येत भाजपाविरोधात आक्रमक भूमिका घेतली, तर “मराठी अस्मितेचा मुद्दा” केंद्रस्थानी ठेवत मतदारांना साद घातली. मात्र ही युती मुंबई आणि आसपास केंद्रित असतानाच, राज्याच्या दुसऱ्या टोकाला एकनाथ शिंदेंनी राजकीय डाव टाकत मनसेला थेट धक्का दिला आहे.
छत्रपती संभाजीनगरमध्ये मनसेचे जिल्हाप्रमुख सुमित खांबेकर यांचा शिंदे गटात प्रवेश हा केवळ पक्षांतर नाही, तर मनसेच्या संघटनात्मक बांधणीवर प्रश्नचिन्ह निर्माण करणारा निर्णय मानला जात आहे. विशेष म्हणजे महापालिका निवडणूक अवघ्या काही दिवसांवर असताना हा प्रवेश झाला आहे.
युती जाहीर होताच मनसेच्या गोटात खळबळ उडणं आणि शिंदे गटाकडून स्थानिक नेतृत्व खेचून नेणं, हा एकनाथ शिंदेंचा “ग्राउंड लेव्हल मास्टरस्ट्रोक” मानला जात आहे. यामुळे ठाकरे–राज युतीचा उत्साह काहीसा कमी करण्याचा प्रयत्न शिंदे गटाकडून झाल्याचं चित्र आहे.
